कागल (प्रतिनिधी) : भारत सरकारच्या वतीने सन २०२७ च्या जनगणनेचा कार्यक्रम जाहीर करण्यात आला असून, या अंतर्गत पहिल्या टप्प्यात ‘घरयादी व घरगणना’ (Houselisting Operations – HLO) प्रक्रिया राबवली जाणार आहे. यंदा प्रथमच ही जनगणना डिजिटल स्वरूपात होणार असून, नागरिकांना स्वतःची माहिती स्वतः भरण्यासाठी ‘सेल्फ-इन्युमरेशन’ (स्वगणना) सुविधा उपलब्ध करून देण्यात आली आहे.
प्रगणक आणि पर्यवेक्षकांचे प्रशिक्षण पूर्ण
जनगणना २०२७ च्या अनुषंगाने कागलचे तहसीलदार कार्यालय यांच्यामार्फत प्रगणक आणि पर्यवेक्षकांच्या प्रशिक्षणाचे आयोजन ‘श्रीमंत जयसिंगराव घाटगे हायस्कूल व ज्युनियर कॉलेज’ येथे करण्यात आले आहे. प्रत्येक बॅचमध्ये २ याप्रमाणे एकूण ६ क्षेत्रीय प्रशिक्षक (Field Trainers) हे प्रशिक्षण देत आहेत.
पहिली बॅच: २७ एप्रिल ते २९ एप्रिल २०२६ दरम्यान १५० कर्मचाऱ्यांचे प्रशिक्षण पूर्ण झाले आहे.
दुसरी बॅच: २ मे ते ४ मे २०२६ दरम्यान आयोजित.
तिसरी बॅच: ५ मे ते ७ मे २०२६ दरम्यान आयोजित.
काय आहे ‘स्वगणना’ (Self-Enumeration) ?
जनगणनेच्या कामात डिजिटल तंत्रज्ञानाचा वापर वाढवण्यासाठी शासनाने https://se.census.gov.in हे वेब पोर्टल सुरू केले आहे.
कालावधी: १ मे ते १५ मे २०२६ या काळात नागरिक घरबसल्या स्वतःची माहिती मोबाईल किंवा संगणकाद्वारे भरू शकतात.
प्रक्रिया: पोर्टलवर माहिती भरल्यानंतर प्रत्येक नागरिकाला एक स्वतंत्र आयडी (ID) प्राप्त होईल. हा आयडी नागरिकांनी जपून ठेवावा.
पडताळणी: १६ मे २०२६ पासून प्रगणक (Enumerator) घरांना भेट देतील. त्यावेळी हा आयडी प्रगणकास दिल्यास, ते पोर्टलवर अपलोड करतील आणि माहिती अधिकृतरीत्या नोंदवली जाईल.
गोपनीयता आणि सुविधा
या पोर्टलवर १४ विविध भाषांमध्ये माहिती भरण्याची सोय आहे. नागरिकांनी दिलेली माहिती पूर्णपणे गोपनीय आणि सुरक्षित राहणार आहे. कागल तालुक्यातील सर्व नागरिकांनी या सुविधेचा लाभ घ्यावा आणि राष्ट्रीय कर्तव्यात आपले योगदान द्यावे, असे आवाहन चार्ज जनगणना अधिकारी तथा तहसीलदार अमरदिप वाकडे यांनी केले आहे.
महत्त्वाच्या तारखा:
स्वगणना कालावधी: १ मे ते १५ मे २०२६
प्रगणकांची घरभेट: १६ मे ते १४ जून २०२६
अधिकृत पोर्टल: https://se.census.gov.in