नागरिकांचा आंदोलनाचा इशारा !
मुरगूड ( शशी दरेकर ) : मुरगूड शहरातून तुकाराम चौक ते जवाहर रोड पर्यंतच्या रस्त्याचे पॅचवर्कच्या कामास स्थानिक नागरिकांनी कडाडून विरोध करीत संपूर्ण रस्त्याचे डांबरीकरण ताबडतोब करण्याची मागणी केली . अन्यथा लवकरच रास्ता रोको आंदोलन करण्याचा इशारा देण्यात आला आहे .
येथील कापशी रोडशी जोडल्या गेलेल्या व मुरगूड निपाणी सी समांतर हुतात्मा तुकाराम चौक ते जवाहर रोड या रस्त्याचे दोन वर्षापासून डांबरीकरण रखडले आहे . शहरातील वाहतूकीची वर्दळ असलेल्या या मुख्य रस्त्यावर खड्डेच खड्डे पडले आहेत अनेकवेळा या रस्त्याच्या डांबरीकरणासाठी आंदोलनाचे इशारे देण्यात आले . त्याची दखल न घेता आता सार्वजनिक बांधकाम विभागाने निधीची तरतूद नाही असे दाखवून पॅच वर्क (खड्डे मुजविण्याचे काम ) सुरु केले आहे . ही मलमपट्टी नको अशी मागणी करीत स्थानिक नागरिकांनी काम बंद आंदोलन केले .
या रस्त्याचे ताबडतोब डांबरीकरण न झाल्यास नागरिकांनी रास्ता रोको आंदोलनाचा इशारा निवेदनाद्वारे संबंधितांना दिला आहे . निवेदन देणाऱ्यामध्ये सामाजिक कार्यकर्ते सर्जेराव भाट , संजय सुर्यवंशी ,किशोर पोतदार, तानाजी भराडे,जगदीश गुरव आदि प्रमुख नागरिकांचा समावेश होता.
