कागल, महाराष्ट्र: महाराष्ट्र शासनाने सर्व वाहनांसाठी हाय सिक्युरिटी रजिस्ट्रेशन प्लेट (HSRP) बंधनकारक केल्यानंतर, ऑनलाइन नोंदणी आणि पेमेंटसाठी अधिकृत वेबसाईट उपलब्ध करून दिली आहे. मात्र, या संधीचा गैरफायदा घेत काही फसव्या वेबसाईट्सनी नागरिकांना लुबाडण्यास सुरुवात केली आहे. विशेषतः, www.bookhighsrp.com ही बनावट वेबसाईट गुगल सर्चवर पहिल्या क्रमांकावर येत असल्याने अनेक नागरिक या फसवणुकीचे बळी ठरत आहेत.
मिळालेल्या माहितीनुसार, जेव्हा ग्राहक HSRP नंबर प्लेट नोंदणीसाठी गुगलवर शोध घेतात, तेव्हा ही बनावट वेबसाईट सर्वप्रथम दिसते. ही वेबसाईट हुबेहूब शासनाच्या अधिकृत वेबसाईटसारखीच दिसत असल्याने नागरिक सहजपणे फसतात. या वेबसाईटवर वाहनाची सर्व माहिती भरल्यानंतर ऑनलाइन पेमेंट केले जाते, परंतु त्यानंतर लक्षात येते की त्यांची फसवणूक झाली आहे.
या बनावट वेबसाईटचा मागोवा घेतला असता, तिचा मालक उत्तर प्रदेशमधील मोहम्मद सारिक नावाचा व्यक्ती असल्याचे समोर आले आहे. नागरिक केलेले पेमेंट थेट त्याच्या खात्यात जमा होत आहे.
गुगलच्या विश्वासार्हतेवर प्रश्नचिन्ह:
सर्वात धक्कादायक बाब म्हणजे, गुगलसारख्या विश्वासार्ह आणि प्रतिष्ठित सर्च इंजिनवर ही बनावट वेबसाईट पहिल्या क्रमांकावर दिसत आहे, तर महाराष्ट्र शासनाची अधिकृत वेबसाईट दुसऱ्या क्रमांकावर आहे. यामुळे गुगलच्या जबाबदार वर्तनावर प्रश्नचिन्ह निर्माण झाले आहे. गुगलने अशा फसव्या वेबसाईट्सना प्राधान्य का दिले, याबाबत चौकशीची मागणी होत आहे.
ही बनावट वेबसाईट शासनाच्या वेबसाईटसारखीच असल्याने मोठ्या प्रमाणात नागरिक फसले जात आहेत आणि त्यांचे ऑनलाइन आर्थिक व्यवहार या बनावट वेबसाईटद्वारे होत आहेत. त्यामुळे, शासनाने या गंभीर प्रकरणाकडे तातडीने लक्ष देऊन संबंधित वेबसाईटवर कठोर कारवाई करावी, अशी मागणी होत आहे. तसेच, उत्तर प्रदेशमधील मोहम्मद सारिक कोण आहे, याचा सखोल तपास करण्याची गरज व्यक्त होत आहे.
नागरिकांना आवाहन: HSRP नंबर प्लेटसाठी नोंदणी करताना, केवळ शासनाच्या अधिकृत वेबसाईटवरच (उदा. parivahan.gov.in किंवा आपल्या राज्याच्या परिवहन विभागाची अधिकृत वेबसाईट) भेट द्यावी आणि कोणतीही अनोळखी किंवा संशयास्पद वेबसाईट वापरणे टाळावे. आपली वैयक्तिक आणि आर्थिक माहिती जपून वापरा.