आडी येथे परमपूज्य परमात्मराज महाराजांचे भक्तिमार्गावर मार्गदर्शन; हजारो भाविकांचा लाभ

आडी (राजकुमार पाटील) : नामस्मरण, पूजाअर्चा आणि सद्ग्रंथांचे वाचन यांसारख्या चांगल्या सवयी अंगीकारून भक्तिमार्गाची सवय जडवावी, असे प्रतिपादन परमपूज्य परमात्मराज महाराज यांनी केले. ते आडी येथील संजीवनगिरीतील श्रीदत्त देवस्थान मठाच्या वतीने वैशाख पौर्णिमेनिमित्त सर्वेज्य सांस्कृतिक भवनात आयोजित प्रवचन कार्यक्रमात बोलत होते.

यावेळी सकाळी श्रीदत्त मंदिरात दत्तगुरूंच्या चरणचिन्हांवर अभिषेक करण्यात आला, त्यानंतर महाआरती झाली. रात्री साडेसात वाजता सर्वेज्य सांस्कृतिक भवनात नामजपानंतर आयोजित प्रवचन कार्यक्रमात प. पू. परमात्मराज महाराज यांनी मार्गदर्शन केले. ते म्हणाले, ‘‘वैशाख पौर्णिमा कूर्म जयंती आणि बुद्ध जयंती अशा अनेक दृष्टीने महत्त्वाची आहे. ऋषी, मुनी, अवतार आणि बुद्धांसारख्या विभूतींनी चांगल्या वर्तणुकीचा संदेश दिला आहे. जर मानवजातीने त्यांच्या शिकवणीचे पालन केले असते, तर जगात आतंकवाद आणि जातीय तेढ निर्माण झाला नसता. सवयींचे गुलाम बनल्यामुळे अनेकदा नकळत चुकीचे वर्तन घडते. वाईट सवयी सोडून देणे आणि त्यांपासून दूर राहणे आवश्यक आहे.’’

महाराजांनी एका चोराचे उदाहरण देत सांगितले की, जसे कर्म असते, तसेच फळ मिळते. दहशतवाद्यांना दहशत पसरवण्याची सवय आहे, तर भारताला त्यांच्या कारवाया मोडून काढण्याची सवय आहे. व्यसनाधीनतेवर बोलताना त्यांनी साधू आणि व्यसनी व्यक्तीच्या संवादातून स्पष्ट केले की, माणूस स्वतःच व्यसनाला धरून ठेवतो, त्यामुळे ते सोडणे महत्त्वाचे आहे.
युनानी संकल्पनेतील ‘हार्पी’ या अतिमानव योनीचा उल्लेख करत महाराज म्हणाले की, वाईट कृत्य करणाऱ्यांना शिक्षा देण्यासाठी नियतीचे ड्रोन कार्यरत असतात.

ज्याप्रमाणे इस्रायलचे ‘हार्पी आणि हारोप’ ड्रोन अतिरेक्यांचा नाश करतात, त्याचप्रमाणे माणसाच्या पापांचे अड्डे नियतीच्या ड्रोनद्वारे नष्ट होतात. त्यामुळे वाईट सवयी आणि कर्म सोडणे गरजेचे आहे. सतत चिंता करण्याच्या वाईट सवयीमुळे होणाऱ्या दुष्परिणामांवरही महाराजांनी भाष्य केले.

ते म्हणाले की, नकारात्मक विचार मनात ठेवल्याने ताण येतो आणि मानसिक आजार होण्याची शक्यता असते. सद्ग्रंथांचे वाचन आणि नामस्मरणाने ताण कमी होतो. जीवनात येणाऱ्या अडचणींचा सामना करण्याचे महत्त्व त्यांनी सांगितले.

महाराजांनी अध्यात्मिक जीवनातील वास्तवावर जोर दिला आणि अभिनयाची सवय टाळण्याचे आवाहन केले. लहानपणीच वाईट सवयींवर नियंत्रण मिळवण्याचे महत्त्व त्यांनी एका लहान मुलाच्या आणि मोठ्या झाडाच्या उदाहरणातून स्पष्ट केले. कोरोना काळात वाईट सवयींमुळे अनेकांचे झालेले नुकसान त्यांनी सांगितले. तसेच, नखे कुरतडण्याच्या वाईट सवयीमुळे होणारे आरोग्यविषयक धोके आणि अंथरुणावर बसून जेवण्याच्या चुकीच्या सवयींविषयी त्यांनी मार्गदर्शन केले. आश्रायणि महर्षींच्या शिकवणीनुसार, संकटे आली तरी साधना सोडायला नको, असा उपदेश त्यांनी दिला.

या प्रवचन कार्यक्रमासाठी विनायक सुधाकर आंबले (निपाणी) यांच्या वतीने महाप्रसादाची सोय करण्यात आली होती. आप्पासो नरसगोंडा पाटील (हंचिनाळ) यांचा ‘जय परेश सर्वायण’ मंत्राच्या साधनेबद्दल, सुखदेव साळुंखे यांचा रुग्णवाहिका देणगीबद्दल आणि इतर देणगीदार भाविकांचा प. पू. परमात्मराज महाराज आणि देवीदास महाराज यांच्या हस्ते सत्कार करण्यात आला. आडी परिसरासह कर्नाटक, महाराष्ट्र, गोवा या राज्यांतून आलेल्या हजारो भाविकांनी या प्रवचन आणि महाप्रसादाचा लाभ घेतला.