गोकुळ शिरगाव (सलीम शेख) : उजळाईवाडी येथील पसरिचानगरमध्ये एका सेवानिवृत्त पोलिस अधिकाऱ्याच्या घरात एका अल्पवयीन मुलाने रिव्हॉल्व्हर चोरून हवेत आणि घराच्या भिंतीवर गोळ्या झाडल्यामुळे परिसरात खळबळ उडाली. सुदैवाने या घटनेत कोणतीही जीवितहानी झाली नाही.
पसरिचानगरमध्ये सेवानिवृत्त पोलिस अधिकारी महावीर भाऊ सकळे हे अनेक वर्षांपासून राहतात. त्यांच्या निष्काळजीपणा मुळे एखाद्याचा जीव गेला असता.
सुदैवाने दुर्घटना टळली. मिळालेल्या माहितीनुसार, त्यांच्याकडील मेड इन जर्मनी ३२ बोर आर्मिनिअस रिव्हॉल्व्हर, ज्यात जिवंत राउंड लोड केलेले होते, ती कपाटात ठेवलेली होती. कपाटाच्या ड्रॉवरला लॉक न करता तो उघडा ठेवला होता.
अंदाजे अवघ्या १३ वर्षांचा मुलगा हातात रिव्हॉल्व्हर घेऊन गल्लीत आणि मोकळ्या माळावर दिवसभर फटाके उडविल्यासारखा गोळ्या झाडत होता.
त्याने सुमारे ३४ पेक्षा जास्त गोळ्या झाडल्या. एखाद्याला गोळी लागली असती तर अनर्थ घडला असता. भरदिवसा घडलेला हा प्रकार कोणालाच कसा समजला नाही? याबाबत पोलिसही आश्चर्यचकित झाले आहेत.
रिव्हॉल्व्हरमधील गोळ्या संपल्यानंतर त्याचे चेंबर उघडून त्याने पुन्हा गोळ्या भरल्या. चोरलेल्या सगळ्या गोळ्या हवेत आणि भिंतीवर उडवून त्याने संपविल्या. लहान वयात याचे ज्ञान त्याला कसे आले, याची चौकशी पोलिसांनी केली. तेव्हा, युट्यूबवर आणि सिनेमात पाहून शिकल्याचे त्याने सांगितले.
या घटनेमुळे परिसरात भीतीचे वातावरण निर्माण झाले आहे. गोकुळ शिरगाव पोलिसांनी अवघ्या काही तासांतच रिव्हाल्वर, पुंगळ्या, ड्रोन ताब्यात घेतले असून, सेवानिवृत्त पोलिस अधिकाऱ्याच्या निष्काळजीपणाबद्दल वरिष्ठ अधिकाऱ्यांकडे परवाना रद्द करण्याचा प्रस्ताव पाठवण्यात आला आहे.
